D’BnL ass hiren Utilisateuren 3,34 Mol méi wäert wéi se kascht

Ouni d’BnL géif der Lëtzebuerger Ekonomie a Gesellschaft e Verloscht vu 29,34 Milliounen Euro entstoen

Pressecommuniqué

Eng Ëmfro, déi Ufank 2025 vum Institut bms marketing research + strategy bei 2.166 Persoune gemaach gouf, bestätegt: D’National­bibliothéik Lëtzebuerg (BnL) ass eng wäertvoll Investitioun.

Mat enger järlecher Dotatioun vu ronn 8,79 Milliounen Euro generéiert d’BnL e Wäert vun 38,13 Milliounen Euro fir déi Lëtzebuerger Wëssens­gesellschaft – an iwwertrëfft domat däitlech hir operationell Käschten. Géif d’Ënnerstëtzung duerch ëffentlech Gelder ewechfalen, géifen der Ekonomie an der Gesellschaft zu Lëtzebuerg e Verloscht vun 29,34 Milliounen Euro entstoen. An anere Wierder: Aus all Euro, deen an d’BnL investéiert gëtt, generéiert si 3,34 Euro u Wäert fir d’Wëssens­gesellschaft.

„Fir mech ass d’National­bibliothéik en onverzichtbare Bestand­deel vun der Lëtzebuerger Fuerschungs- a Wëssenslandschaft“, huet de Kultur­minister Eric Thill haut op der Presse­konferenz erkläert.

De komplette Rapport eroflueden

Positionéierung als wëssenschaftlech Bibliothéik bestätegt

96 % vun de Befrote sinn an der BnL ageschriwwen. Déi gréisste Benotzer­grupp besteet aus Privat­persounen (66 %), duerno kommen d’Studenten (13 %). 74 % vun de Benotzer hunn een Universitéits­diplom. „Mat eiser Positionéierung als wëssenschaftlech Bibliothéik – wéi an eiser Visioun 2030 definéiert – si mir kloer um richtege Wee“, huet den Direkter vun der BnL, de Claude D. Conter, kommentéiert.

Aussergewéinlech héich Zefriddenheet a Loyalitéit

96 % vun de Benotzer si mat der BnL zefridden. 84 % bewäerten d’Servicer als aussergewéinlech – dovun 38 % als exzellent a 46 % als ganz gutt. 84 % gesinn d’BnL als Standuert­virdeel. 96 % géifen d’BnL ouni ze zécke recommandéieren. D’Zefriddenheet vun den Notzer läit bei 94 vun 100 Punkten – „e sensationellt Resultat, wann een et mat anere Secteure vergläicht, wou de beschte Bench­mark am Educatiouns­beräich nëmme bei 56 Punkte läit“, esou d’Dr Sabine Graumann, Senior Vice President Information & Library Consultancy bei bms marketing research + strategy.

(v.l.n.r.) Eric Thill, Claude D. Conter, Sabine Graumann, Peter Kurz

Wéi vill ass d’BnL hiren Utilisateuren tatsächlech wäert?

Fir dës Fro ze ënnersichen, gouf am Questionnaire en hypotheetesche Zenario presentéiert, an deem d’ëffentlech Finanzéierung vun der BnL géif ewechfalen an hir weider Existenz a Fro gestallt wär. Virun dësem Hannergrond goufe fënnef Haaptfroe gestallt:

  • Aktuelle Käschtenopwand: 72 % vun de Benotzer ginn aktuell manner wéi 20 € pro Mount fir d’Servicer vun der BnL aus. D’Strategie vun der BnL bleift et, e gratis Zougang ze bidden.
  • Alternativen notzen: Géif et d’BnL net méi ginn, géifen 71 % vun de Befroten sech „beanträchtegt“ fillen, vun de Partner­bibliothéiken wären esouguer 76 % „ganz staark beanträchtegt“. En Drëttel rechent mat zousätzleche Käschten tëscht 1 % a 25 %, e weidere Drëttel mat Méikäschten tëscht 51 % a 75 %.
  • Präiserhéijungen akzeptéieren: 35 % géifen hir Notzung net änneren, mee 44 % géifen se reduzéieren, wann ee fir d’Servicer bezuele misst.
  • Bereetschaft ze bezuelen: 59 % wiere bereet, fir d’Weiderbestoe vun der BnL ze bezuelen, och wann 62 % der Meenung sinn, datt d’BnL weiderhi soll ëffentlech finanzéiert ginn.
  • Kompensatiouns­fuerderungen un de Staat: Am Fall vun enger hypotheetescher Opléisung géifen déi gefuerdert Kompensatioune wäit iwwer der aktueller ëffentlecher Finanzéierung vun 8,79 Milliounen Euro leien.

Dës Froen erlaben eng realistesch Bewäertung vun der Bereetschaft, fir e Service ze bezuelen, a vun der Akzeptanz, potenzielle Fraisen ze bezuelen. Dëst ass d’Grondlag fir d’Berechnung vum Méiwäert duerch déi sougenannt Contingent Valuation Method.

D’BnL ass hiren Utilisateuren 3,34 mol méi wäert, wéi se kascht

„D’Resultater schwätze fir sech“, sot de Peter Kurz, Senior Vice President Innovations & Methods bei bms marketing research + strategy, deen d’Berechnungen duerchgefouert huet. Géif d’Finanzéierung ewechfalen, géifen der Ekonomie an der Gesellschaft zu Lëtzebuerg e Schued vun 29,34 Milliounen Euro entstoen. Anescht ausgedréckt: All Euro, deen d’BnL kritt, bréngt 3,34 Euro u Wäert zeréck fir déi Lëtzebuerger Wëssens­gesellschaft. Privat­persoune missten all Joer 16 Milliounen Euro opbréngen. Partner­bibliothéiken géife Servicer am Wäert vun 18,85 Milliounen Euro pro Joer missen iwwerhuelen.

Entdeckt de komplette Rapport

Iwwer d’Contingent Valuation Method

Wéi vill ekonomesche Profit bréngt d’BnL der Lëtzebuerger Wëssensgesellschaft? An der Etude gouf d’Contingent Valuation Method (CVM) applizéiert – eng bewäert an empiresch fundéiert Method, déi säit den 1980er Jore weltwäit agesat gëtt an esouguer viru Geriichter an den USA unerkannt ass. Dës Method, déi vun Nobelpräisdréier entwéckelt gouf, bitt ëffentlechen Institutiounen eng objektiv Grondlag, fir hire wirtschaftleche Méiwäert ze moossen.

D’Benotzer goufe mat fënnef Schlësselfroe konfrontéiert: Wéi intensiv notzen si d’BnL a wéi héich sinn hir aktuell Käschten? Géife si méiglech Erhéijunge vun de Präisser akzeptéieren? Wéi héich wären d’Käschten, wa si op Alternativen zréckgräife missten? A wiere si bereet, selwer ze bezuelen oder géife si eng Entschiedegung vum Staat verlaangen?

Iwwer bms marketing research + strategy

bms marketing research + strategy gouf 1995 gegrënnt a war vun Ufank u spezialiséiert op international B2B- an industriell Maartfuerschung. Zënter 1996 konzentréiert sech bms op de Beräich Choice Modelling an Trade-off Analysis.

Mat méi wéi 2.000 erfollegräich ofgeschlossene Projete féiert bms aktuell all Joer iwwer 200 Projeten a méi wéi 40 Produktkategorien duerch. D’Haaptkompetenz vum Institut läit bei multivariater Statistiken a methodeschen Approchen, déi op bewosst Auswiel- an Evaluationsprozesser baséieren.

bms ass stänneg op der Sich no innovativen Usätz a beméit sech, nei Fuerschungsusätz an déi alldeeglech Praxis ze iwwerdroen.

Duerch déi enk Verbonnenheet mat der akademescher Welt präsentéiert bms reegelméisseg déi neist Entwécklungen op internationale Konferenzen. D’Ekipp besteet aus zwielef Datenanalysten, Statistiker an Experten, déi iwwer déifgräifend Fachwëssen a Maartkenntnisser, en detailléiert Verständnis fir d’Ufuerderunge vun de Cliente souwéi enger relevanter Expertise an der Dateanalys, -interpretatioun an der methodescher Berodung verfügen. bms publizéiert seng Fuerschungsresultater reegelméisseg a peer-reviewed Fachzäitschrëften a Konferenzbänn.

Aktualiséiert den