Missiounen a geschichtlechen Iwwerbléck
Missiounen a geschichtlechen Iwwerbléck
Missiounen
Gesetzleche Kader
D’Aufgabe vun der Nationalbibliothéik Lëtzebuerg si gesetzlech festgeluecht a decken e breede Beräich of:
- Als patrimonial Bibliothéik sammelt, versuergt, dokumentéiert a vermëttelt si dat nationaalt kulturellt Ierwen, besonnesch am Kader vum Dépôt légal. Si ergänzt a verdéift hir Sammlungen, geréiert Spezialsammlungen (Manuskripter, rar a wäertvoll Dréck, Museksdokumenter, ikonografesch Materialien, Kaarten a Pläng asw.) a stellt d’Nationalbibliographie zesummen.
- Als wëssenschaftlech a Fuerschungsbibliothéik baut si Sammlunge mat net-lëtzebuergeschem Ursprong op, dorënner gedréckten an digital Publikatiounen, Datebanken an audiovisuellt Material.
- Si garantéiert den Zougang zu de Sammlungen op der Plaz an op Distanz, ënner anerem duerch de Prêt an d’Consultatioun am Liessall, an och mat Hëllef vu modernen Technologien.
- Si koordinéiert an ënnerstëtzt de nationale Bibliothéiksreseau, geréiert gemeinsam IT-Systemer, fërdert eenheetlech bibliothéikswëssenschaftlech Standarden a bedeelegt sech un der Gestioun vu Metadaten an nationalen an internationalen Identifikatiounssystemer.
- Si engagéiert sech an der Fuerschung, der Weiderbildung an der Kooperatioun an organiséiert wëssenschaftlech Projeten, Konferenzen a kulturell a pedagogesch Aktivitéiten.
Relevant Theemen
Geschichtlechen Iwwerbléck
1798
Am Joer 1798 grënnen d’Autoritéite vun der franséischer Republik déi éischt ëffentlech Bibliothéik zu Lëtzebuerg. Si setzt sech aus Sammlunge vun opgeléiste Bibliothéiken zesummen, dorënner déi vun der fréierer Staatsbibliothéik, de Jesuitten an e puer Klouschterbibliothéiken (Iechternach, Stad Lëtzebuerg, Orval). D’Bibliothéik gëtt an de Späicher vum alen Athénée ënnerbruecht.
1850
Am Joer 1850 ginn e puer Institutiounen zesummegeluecht. D’Stadbibliothéik, gegrënnt 1802, fusionéiert mat der Bibliothéik vum Athénée vu Lëtzebuerg an der Bibliothéik vun der Gesellschaft fir d’Erfuerschung an Erhale vun historesche Monumenter (gegrënnt 1845).
1899
Am Joer 1899 gëtt d’Bibliothéik fir d’éischte Kéier an engem staatlechen Dokument offiziell als »Nationalbibliothéik« bezeechent, am Entworf vum Staatsbudget.
1941–1944
Tëscht 1941 an 1944 steet d’Nationalbibliothéik, deemools »Landesbibliothek« genannt, ënner der Kontroll vun den nationalsozialisteschen Autoritéiten. Si gëtt an e Bankgebai um Boulevard Royal verluecht.
1958
1958 kritt d’Nationalbibliothéik mat dem Gesetz vum 5. Dezember e gesetzleche Status. De Pierre Frieden gëtt den éischten Direkter vun der Institutioun. Gläichzäiteg gëtt den Dépôt légal agefouert, deen der Bibliothéik eng national bibliographesch Aufgab gëtt.
1960
An den 1960er Jore stäerkt d’BnL hir Roll als wëssenschaftlech Bibliothéik. Si verzicht progressiv op hire Bestand u Fräizäitliteratur a konzentréiert sech op spezialiséiert Sammlungen.
1973
1973 plënnert d’Nationalbibliothéik an dat renovéiert Gebai vum ale Athénée um Boulevard Roosevelt.
1989
1989 gëtt den Centre d’études et de documentation musicales (Cedom) duerch de groussherzoglech Reglement vum 11. Juli an der BnL gegrënnt.
2013
Am Joer 2013 gëtt de Gesetzesprojet fir de Bau vun engem neie Gebai um Kierchbierg an der Stad ugeholl.
2014
De 26. Juni 2014 gëtt de Grondstee fir dat neit Gebai geluecht.
2019
Tëscht dem 1. Abrëll 2019 an dem 30. September 2019 plënnert d’Nationalbibliothéik an hir nei Raimlechkeeten um Kierchbierg. Den 30. September 2019 gëtt dat neit Gebai offiziell ageweit.
Aktivitéitsrapporte vun de leschte Joren
Aktualiséiert den