Missiounen a geschichtlechen Iwwerbléck

Missiounen a geschichtlechen Iwwerbléck

D’Nationalbibliothéik sammelt, katalogiséiert a konservéiert all déi gedréckten an digital Publikatiounen, déi zu Lëtzebuerg an am Ausland verëffentlecht ginn an e Bezuch zum Grand-Duché hunn. Si ass déi wichtegst Patrimonial-, Wëssenschafts- a Fuerschungsbibliothéik vum Land. Als Wëssenschafts- a Fuerschungsbibliothéik huet si den Usproch vun enger Fachbibliothéik: Zirka dräi Véierel vun hirem Printbestand sinn aus dem Ausland an decke sëllege Wëssensberäicher of, fir d’Besoine vun de Benotzer esou wäit ewéi méiglech erfëllen ze kënnen.

Missiounen

D’Missiounen vun der Nationalbibliothéik sinn définéiert duerch d’Loi modifiée du 25 juin 2004 portant réorganisation des instituts culturels de l’Etat.

Der BnL hir Missioune sinn:

  1. Si këmmert sech ëm den Dépôt légal wéi am Artikel 10 definéiert a geréiert déi doraus resultéierend Sammlungen,
  2. Si ergänzt dës Sammlungen duerch de Kaf vu gedréckten oder digitale Publikatiounen, déi am Ausland publizéiert goufen an de Grand-Duché  betreffen oder déi vun Auteuren erstallt goufen, déi e Lien mam Grand-Duché hunn,
  3. Si compiléiert an diffuséiert déi national Bibliographie,
  4. Si conservéiert a beräichert den nationale Patrimoine,
  5. Si geréiert speziell Sammlungen: Manuskripter, rar a wäertvollt Dréckmaterial, Grafikdokumenter, Kaarten a Pläng, Reliuren, Partituren, Toundokumenter, illustréiert Bicher a Kënschtlerbicher,
  6. Si conservéiert offiziell Publikatioune vun internationalen Organisatiounen oder Publikatiounen déi se duerch international Conventioune krut;
  7. Si sammelt, katalogiséiert, konservéiert a beräichert seng net-lëtzebuergesch Fongen,
  8. Si gëtt esou vill wéi méiglech Persounen Zougang zu hire Sammlungen, och duerch Prêten an Online-Accès, an dat dank de modernsten Technologien,
  9. Si assuréiert d’Koordinatioun vum Reseau vun de Lëtzebuerger Bibliothéike bibnet.lu,
  10. Si geréiert de Kollektivkatalog,
  11. Si dréit zur Entwécklung vum Bibliothéikswiesen um nationalen an internationalem Niveau bäi.

Geschichtlechen Iwwerbléck

1798

D’Autoritéite vun der Franséischer Republik hunn déi éischt ëffentlech Bibliothéik zu Lëtzebuerg opgebaut. Dës besteet aus den opgeléiste Kollektioune vun der Bibliothéik vun de fréiere Stänn vu Lëtzebuerg, der Jesuittebibliothéik an de Bibliothéike vun anere reliéisen Uerden (Stad Lëtzebuerg, Iechternach, Orval). Si war um Späicher vum fréieren Athénée ënnerbruecht.

1850

Fusioun vun der 1802 gegrënnter Gemengebibliothéik mat de Bibliothéike vum Athénée de Luxembourg a vun der Société pour la recherche et la conservation de monuments historiques, déi 1845 gegrënnt gouf.

1899

D’Bibliothéik gëtt fir d’éischte Kéier an engem offizielle staatlechen Dokument als „Bibliothèque nationale“ bezeechent.

1941-44

D’BnL, déi „Landesbibliothek“ ginn ass, gëtt der Opsiicht vun den Nazi-Autoritéiten ënnerstallt an an e Bankgebai um Boulevard Royal geplënnert.

1958

Mam Gesetz vum 5. Dezember 1958 huet d’BnL elo e legale Status. De Pierre Frieden gëtt den éischte Chargé de direction vun der BnL. Den Dépôt légal zu Gonschte vun der BnL als bibliographesch Agence gëtt agefouert.

Ab 1960

D’BnL konzentréiert sech op hir Missioun als wëssenschaftlech Bibliothéik a gëtt hir Sammlung vun Ënnerhalungsliteratur op.

1973

D’BnL plënnert an d’renovéiert Gebai vum Athénée um Boulevard Roosevelt.

1989

Grënnung vum Centre d’études et de documentation musicales (Cedom) duerch de Règlement grand-ducal vum 11. Juli 1989.

2013

Vott iwwer de Gesetzesprojet fir de Bau vum neie Gebai um Kierchbierg

26.06.2014

Éischte Spuetestéch

01.04.2019

Et gëtt mam Plënneren ugefaangen.

30.09.2019

Aweiung vum neie Gebai

Joresberichter

All Publikatiounen

Aktualiséiert