ARKe kënnen allen digitalen, physeschen oder abstrakte Géigestänn zougeuerdent ginn: digitaliséierten oder digital entstanenen Dokumenter an Objeten, (wëssenschaftlechen) Publikatiounen an Datesätz, genealogeschen Duerstellungen, Muséesexemplairen, Léiermaterialien, Auteuren, Wëssenschaftler an esou weider. Zënter 2001 hu sech weltwäit méi wéi 1.000 Organisatioune fir d’Zouweise vun ARKe gemellt; heizou gehéieren National- an Universitéitsbibliothéiken an -archiven, Konschtmuséeën, naturhistoresch Muséeën, Editeuren, Datenzenteren, staatlech Ariichtungen, Händler a Fuerschungslaboratoiren.

ARKe stellen e kontinuéierlechen Zougang zu digitalen Informatioune sécher a garantéiere Stabilitéit trotz technologesche Verännerungen (wéi Ännerunge vun Zougangs-URLen duerch System-Upgraden oder Formatmigratiounen) oder organisatoreschen Ännerungen (wéi dem Wiessel vum Numm vun enger Organisatioun). Si verbesseren d’Zitéierbarkeet vu Linken an erlaben et dem Notzer, konkreet digital Ressourcë méi einfach iwwer Hyperlinken ze referenzéieren an ze identifizéieren. Dëst mécht et méi einfach, Ressourcen a ganz ënnerschiddleche Kontexter, wéi Publikatiounen, wëssenschaftlechen Artikelen, Websäiten oder Bookmarken, ze zitéieren, an et erhält d’Stabilitéit an d’Funktionalitéit vun den Hyperlinken iwwer d’Zäit.

Wann en ARK-Identifier bis emol zougeuerdent a mat engem Objet verbonnen ass, bleift en op onbestëmmten Zäit unique. Souguer wann eng Ressource suppriméiert gëtt, ass et extreem wichteg, dass e verëffentlechten ARK weider besteet an de Notzer entweeder zu de Metadate vun der Ressource oder zu enger Erklärung fir hir Net-Zougänglechkeet féiert. Ausserdeem kann een dem Notzer Zougang zu enger Ersatzressource ginn.

D’Zeechekombinatiounen, déi a Persistent Identifier benotzt ginn, sinn am Allgemengen „opak“ (ouni Bedeitung) a vermëttelen absichtlech wéineg Informatiounen iwwer déi Saach, där se zougeuerdent sinn. Opak Identifier bleiwen iwwer d’Zäit onverännert a garantéieren e konstanten Zougang zu digitale Ressourcen, och wann hiren Emplacement oder d’Metadaten änneren. Doduerch, dass keng Informatiounen iwwer d’Ressource selwer vermëttelt ginn, gëtt och de Schutz vun der Privatsphär an d’Sécherheet verbessert.

Metadaten („Daten iwwer Daten“, d.h. Informatiounen iwwert eng Ressource) maachen et vill méi einfach, fir opak Identifier ze verstoen, déi keen Hiweis op dat enthalen, wat duerch si identifizéiert gëtt, a fir domat ze schaffen. Ouni Metadate wier déi eenzeg Méiglechkeet, fir erauszefannen, op wat fir een Objet en ARK verweist, dass een direkt géif op den Objet zougräifen. Onofhängeg dovun, ob en ARK zu enger Websäit oder engem Fichier féiert, liwweren d’Metadaten wichteg Informatiounen iwwert den Objet, wéi z.B. den Datum, op deem e kreéiert gouf, seng Originn, an d’eventuell Verfügbarkeet vu méi neie Versiounen. Fir op Metadaten vun enger Ressource zouzegräifen, kann een einfach bei den ARK „?info“ bäiflécken (Beispill: https://persist.lu/ark:70795/tm9z0j?info). Och wann d’Kreatioun vu Metadaten net onbedéngt noutwendeg ass, gëtt se awer staark recommandéiert, fir d’Benotzen an d’Verwalte vun ARKe méi einfach ze maachen.

Am Fall vum Persistent-Identifier-Service vun der BnL enthalen d’Metadaten Informatiounen iwwer d’Organisatioun, déi den ARK kreéiert huet, déi aktuell Zougangs-URL fir d’Ressource an den Zäitpunkt vun der Kreatioun a vum leschten Update vum ARK. Fir dass een et besser versteet, sinn dës Metadaten als Äntwert op d’Froe „Wien?“, „Wat?“ a „Wéini?“ strukturéiert.

D’„Policy / Persistence Statement“ („Politik / Persistence-Erklärung“) gëtt en Iwwerbléck iwwer der Organisatioun hiren Engagement am Zesummenhang mat der Aart a Weis, wéi d’Ressource verbreet wäert ginn, an domat, ob de Contenu am Laf vun der Zäit wäert änneren oder wéi laang se wäert accessibel bleiwen.