Nationalbibliographie
Nationalbibliographie
D’Nationalbibliothéik stellt d’Nationalbibliographie vun de Publikatiounen, déi duerch den Dépôt légal era kommen oder déi zousätzlech kaaft goufen zesummen a publizéiert se. Si erfaasst all Publikatiounen, esou wuel gedréckt ewéi och digital, déi zu Lëtzebuerg verëffentlecht goufen, an och déi, déi am Ausland am Zesummenhang mam Grand-Duché rauskomm sinn.
Sichen a consultéieren
Um Portal vun der Nationalbibliographie sinn d’Referenze thematesch klasséiert, an d’Benotzer kënne verschidden Themen auswielen oder no Titel, Auteur, Publikatiounsjoer oder mat Stëchwierder sichen. Iwwer d’Portal kënnen och Dokumenter reservéiert ginn, entweder fir de Prêt oder d’Consultatioun am Liessall.
Wéi eng Dokumenter ginn erfaasst?
Déi erfaassten Dokumenter beinhalte Publikatiounen, déi zu Lëtzebuerg publizéiert goufen an och déi, déi am Ausland eraus koumen an de Grand-Duché, seng Staatsbierger oder seng Awunner betreffen. Och berücksichtegt gi Publikatioune vu Lëtzebuerger Auteuren a vun Auteuren déi eng Verbindung mam Grand-Duché hunn.
Verschidden Zorte vun Dokumenter ginn dogéint net rezenséiert. Dozou gehéiere Reklammen ouni dokumentareschen Interessi, Programmer fir Feierlechkeeten ouni Saachartikelen a Wierker vu flüchtegem Wäert, wéi Telefonsbicher, Stonnepläng, Präislëschten an änlech Publikatiounen. Och Postkaarte ginn net erfaasst. Zulescht ginn och Publikatiounen, déi vun Ariichtunge vun der Europäescher Unioun erausgi ginn, an deenen hiren Inhalt net spezifesch mam Grand-Duché verbonnen ass, net an der Bibliographie opgefouert.
Iwwer d’Nationalbibliographie
Déi éischt Editioun vun der Lëtzebuerger Nationalbibliographie koum 1946 eraus (fir d’Beriichtungszäit vum 10. September 1944 bis den 31. Dezember 1945). Duerno gouf se all Joer publizéiert bis 2005 (Referenzjoer 2004), wou d’Nationalbibliothéik d’Verëffentlechung vun der Pabeierversioun zugonschte vun enger digitaler Versioun, déi online zougänglech ass a stänneg aktualiséiert gëtt, gestoppt huet.
Déi aktuell Nationalbibliographie, déi online zougänglech ass, enthält déi Lëtzebuerger Publikatiounen, déi zënter 1985 an d’Nationalbibliothéik erakomm sinn. Publikatioune vu virun dësem Datum gi no an no bäigefüügt fir dës wichteg Sammlung ze ergänzen.
Aktualiséiert den