Tipps fir Är éischt Visitt

Tipps fir Är éischt Visitt

Dir sidd déi éischte Kéier an der Nationalbibliothéik? Hei fannt Dir eis Tipps a Tricks fir Är Visitt gutt virbereeden ze kënnen.

Adress an Accès

D’Adress vun der Nationalbibliothéik ass 37D avenue John F. Kennedy zu Lëtzbuerg-Kierchbierg. Si ass einfach iwwert den ëffentlechen Transport oder mam Vëlo erreechbar. Mir hunn och en ënnerierdesche Parking.

Jiddwereen dierf gratis an de Liessall eran – och ouni Bibliothéikskaart. Vergiesst trotzdeem net eis Ëffnungszäiten ze kucken, éiert Dir Iech op de Wee maacht!

Méi gewuer ginn

Adequat Verhalen am Liessall

D’Nationalbibliothéik ass déi ideal Plaz fir a Rou ze schaffen a ze studéieren. Géigesäitege Respekt an e Minimum u Kaméidi sinn dofir wichteg.

D’Nationalbibliothéik ass eng Archivbibliothéik a leet besonnesche Wäert drop, dass hir Bestänn erhale bleiwen an net beschiedegt ginn. Aus dësem Grond sinn e.a. Poschen, Mäntel a grouss Géigestänn am Liessall net erlaabt. Am Foyer fannt Dir gratis Vestiairen fir Är perséinlech Objeten anzespärren.

Iessen an drénken ass am Liessall och verbueden. Waasserfläschen sinn erlaabt, dëst ënnert der Konditioun, datt se duerchsiichteg sinn an eng maximal Kapazitéit vu 500 ml hunn.

De Liessall entdecken D'Aarbechtsraim entdecken

Prêt a Consultatioun

Den Accès an d’Nationalbibliothéik ass gratis. Am Liessall dierft Dir och ouni Bibliothéikskaart Dokumenter selwer aus de Regaler huelen an se consultéieren.

Allerdéngs ass d’Majoritéit vun eise Fongen an de Magasénge stockéiert a ka just vun ageschriwwene Lieser consultéiert ginn. Bicher mat heem huelen dierfen allerdéngs just Leit mat Wunnsëtz zu Lëtzebuerg oder an de Grenzregiounen.

D’Aschreiwung fir eng Bibliothéikskaart ass fir all Persoun ab 14 Joer gratis.

Méi iwwert d’Aschreiwung Méi iwwert de Prêt

Recherchéieren

D’Nationalbibliothéik huet iwwer 1,8 Millioune physesch Dokumenter aus ville verschiddene Kollektiounen. Fir d’Recherche vun all de physeschen an digitale Ressourcë vun der BnL steet Iech d’Online-Sichmaschinn a-z.lu zur Verfügung.

Dëse Portail bitt sëllege Sich- a Filterfunktiounen. Dir kritt net just d’Lëscht mat de Resultater ugewisen, mee och d’bibliographesch Donnéeën, d’Inhaltsverzeechnes oder de Buchdeckel. Mat Hëllef vun de Filteroptiounen hutt Dir d’Méiglechkeet, d’Resultater ze preziséieren oder d’Sich no ënnerschiddleche Krittären anzeschränken. Iwwer e Link kommt Dir vun a-z.lu bei déi digital Dokumenter. Sëlleg aner Funktiounen, ewéi d’Erstellen an d’Verwalte vun enger Favorittelëscht, eng Zitéierhëllef oder d’Verschécken vun enger Sichufro, erliichteren d’Recherche mat a-z.lu.

Méi iwwer a-z.lu

Aktualiséiert den