a-z.lu
a-z.lu
Mat just e puer Klicks bréngt Iech a-z.lu bei Äert gewënschte Resultat – egal ob et sech ëm gedréckten oder digital Dokumenter handelt. Mat dëser Online-Sichmaschinn kënnt Dir de ganze physeschen an digitalen Dokumenter- a Mediebestand vun der Nationalbibliothéik a vun all de Bibliothéike vum bibnet.lu-Reseau a vum Konsortium Lëtzebuerg duerchsichen.
Sichen a filteren
a-z.lu bitt sëllege Sich- a Filterfunktiounen. Dir kritt net just d’Lëscht mat de Resultater ugewisen, mee och d’bibliographesch Donnéeën, d’Inhaltsverzeechnes oder de Buchdeckel. Mat Hëllef vun de Filteroptiounen hutt Dir d’Méiglechkeet, d’Resultater ze preziséieren oder d’Sich no ënnerschiddleche Krittären anzeschränken. Iwwer e Link kommt Dir vun a-z.lu bei déi digital Dokumenter.
Sëlleg aner Funktiounen, ewéi d’Erstellen an d’Verwalte vun enger Favorittelëscht, eng Zitéierhëllef oder d’Verschécken vun enger Sichufro, erliichteren d’Recherche mat a-z.lu.
Ausléinen a consultéieren
Digital Dokumenter
Wann Dir an der Sichmaschinn a-z.lu d’Referenz vun engem digitalen Dokument fannt, da klickt einfach op de Link „Online ansehen“/„Consulter en ligne“ ënnert dem Titel vum Dokument. Jee no Zort Dokument kann et sinn, dass Dir nach op eng Zwëschesäit kommt oder dass Dir e weidere Programm braucht, fir d’Dokument consultéieren ze kënnen.
Physesch Dokumenter
Wann Dir an der Sichmaschinn a-z.lu d’Referenz vun engem Dokument recherchéiert hutt, da gesitt Dir an der bibliographescher Notiz, wou et am Liessall steet oder wéi Dir et bestelle kënnt.
Steet en Dokument am Liessall, da musst Dir et selwer aus dem Regal huelen a kënnt et, fir mat heem ze huelen, am Guichet ausléinen oder iwwer automatesch Prêt-/Retourmaschinnen selwer ausléinen. Mierkt Iech d’Cote vum Dokument, fir et am Liessall ze fannen. a-z.lu bitt Iech och d’Funktioun, eng GPS-Kaart vum Liessall opzemaachen, op där Iech de Wee bei d’Dokument ugewise gëtt.
Ass den Titel am Magaséng, geet Iech e BnL-Mataarbechter d’Dokument sichen. Dir musst den Titel just iwwer a-z.lu bestellen. Wann net schonn eng aner Persoun d’Dokument ausgeléint huet, dann dauert et maximal zwou Stonnen, bis Dir et am Guichet ofhuele kënnt. Dir kritt per E-Mail gesot, esou bal en Titel prett ass, fir ofgeholl ze ginn.
Mäi Lieserkont
Fir op Äre Lieserkont zouzegräife musst Dir Iech just aloggen an uewe riets op de Menü klicken. An Ärem Lieserkont gesitt Dir eng Lëscht vun aktuellen a fréiere Prêten, Är Reservatiounen an en Historique vun Äre Recherchen. Dir kënnt Är Prête verlängeren, Reservatiounen annuléieren an Är perséinlech Donnéeë beaarbechten.
Oft gestallte Froen
Wéi maachen ech eng einfach Recherche?
Gitt op a-z.lu, schreift Är Stéchwierder einfach an d’Sichleescht uewen op der Säit a lancéiert dann Är Sich! Duerno hutt Dir d’Optioun Är Resultater mat Hëllef vu Filteren ze verfeineren.
Wéi maachen ech eng erweidert Recherche?
Falls Dir no engem bestëmmten Dokument oder Thema sicht, recommandéiere mir Iech d’erweidert Sichfunktioun ze benotzen, déi et Iech erlaabt mat Hëllef vun de booleschen Operatoren UND, ODER, NICHT komplex Recherchen ze maachen.
Gitt op a-z.lu, klickt op de Knäppchen „Erweiterte Suche“/„Recherche avancée“ riets nieft der Sichleescht a wielt verschidde Critèren aus.
Wéi filteren ech meng Resultater?
Nodeems Dir eng Sich gestart hutt, ginn Iech d’Resultater ugewisen. Op der lénker Säit gesitt Dir Informatiounen zu all Dokument, wéi z. B. d’Publikatiounszort (Buch, Artikel asw.), den Titel, den Auteur an d’Verëffentlechungsjoer.
Op der rietser Säit fannt Dir Filteroptiounen, mat deenen Dir Är Recherche verfeinere kënnt. Esou kënnt Dir z. B. entscheeden, ob Dir nëmme physesch Dokumenter oder digital Ressourcen ugewise kréie wëllt. Dir kënnt och no Typ vun Dokument, Bibliothéik, Sprooch, Auteur, Erstellungsdatum oder Thema filteren. Dir kënnt verschidde Filteren oder souguer verschidde Wäerter fir den nämmlechte Filter kombinéieren.
Nodeems Dir e Filter ugewannt hutt, kënnt Dir en zu all Ament nees ewech huelen, andeems Dir op dat grot Kräiz nieft dem Filter uewe riets um Bildschierm klickt.
Wéi verlängeren ech e Prêt?
Fir e Prêt ze verlängeren, klickt fir d’éischt uewe riets op der Säit op Ären Numm an dann op „Meine Ausleihen“/„Mes prêts“. Dir gesitt hei all déi Dokumenter, déi Dir grad ausgeléint hutt a wéini se zréck bruecht musse ginn. Dir kënnt e Prêt verlängeren, andeems Dir nieft dem Dokument op „Verlängern“/„Renouveler“ klickt.
Dir kënnt och all Är Prêten an enger Kéier verlängeren, andeems Dir op „Alle verlängern“/„Tout renouveler“ klickt.
Aktualiséiert