De Konsortium Lëtzebuerg këmmert sech ëm d’Acquisitioun an d’Gestioun vun digitale Publikatiounen. Seng Offer ass vun zentraler Bedeitung fir d’Entwécklung vun der Wëssensgesellschaft an erméiglecht et, der Wëssenschaft, der Fuerschung, de Regierungsbeamten an der breeder Ëffentlechkeet vill verschidde Publikatiounen zur Verfügung ze stellen. D’BnL koordinéiert de Konsortium Lëtzebuerg a këmmert sech ëm d’Administratioun, d’Softwareverwaltung, den Zougrëff an ëm d’Verhandlung vu Lizenzen an Abonnementer.

D’Konsortium-Partner sinn niewent der Nationalbibliothéik d’Uni Lëtzebuerg, de Luxembourg Institute of Science and Technology (LIST) an de Luxembourg Institute of Health (LIH). De Konsortium Lëtzebuerg schafft och mam Max-Planck-Institut Luxemburg, dem Luxembourg Institute of Socio-Economic Research (LISER), dem Institut de formation de l’Éducation nationale (IFEN) an dem Service de coordination de la recherche et de l’innovation pédagogiques et technologiques (SCRIPT) zesummen.

2017 ass aus enger Kooperatioun tëschent der BnL, dem Ministère vun der Fonction publique an dem Zentrum fir Informatiounstechnologië vum Staat (CTIE) d’Regierungsbibliothéik bibgov.lu entstanen. Si stellt de Ministèren a staatleche Verwaltunge spezialiséiert digital Ressourcen zur Verfügung.

De Konsortium Lëtzebuerg koordinéiert a geréiert och de Projet ebooks.lu, en digitale Service, bei deem ee gratis E-Books an digital Lauschterbicher op Franséisch, Däitsch an Englesch ausléine kann, an dee fir d’Lieser vun der Nationalbibliothéik, vum Bicherbus a vu verschiddenen ëffentleche Bibliothéiken zu Lëtzebuerg zougänglech ass.