D’Nationalbibliothéik rifft zu Donen op Ären Don, eise gemeinsame Patrimoine

De Kulturminister Eric Thill an de Claude D. Conter, Direkter vun der Nationalbibliothéik (BnL), hunn den Dënschdeg,  5. November 2024, zu enger Pressekonferenz agelueden, fir e raart, bal dausend Joer aalt Manuskript virzestellen, dat d’BnL viru kuerzem kaf huet a wat dat d’kulturellt an historescht Ierwe vum Land bedeitend beräichert.

En aussergewéinlecht Dokument

Dëse Manuskript ass de leschten Exemplaire vun enger Risebibel aus dem 11. Joerhonnert, dat bis elo a privatem Besëtz war. Et ass net just en aussergewéinlecht seelent Dokument, mee et zeechent sech och duerch säin exzellenten Zoustand aus. Andeems d’BnL dësen dausend Joer ale Schatz zeréckbréngt, erhält d’BnL e fir d’Zukunft a gëtt Lëtzebuerg ee vun de formidabelsten Zeie vu senger Vergaangenheet zeréck.

Et ass extrem rar, datt e Manuskript no bal engem Joerdausend erëm zu sengem „Gebuertsuert“ zeréckfënnt, a nach méi rar, datt seng Provenienz iwwer esou eng laang Zäit nogewise ka ginn. D’Risebibel, déi d’BnL no laange Verhandlunge kafe konnt, ass en eenzegaartegt Beispill dovun. – Claude D. Conter, Direkter vun der BnL

„Ären Don, eise gemeinsame Patrimoine“ – Opruff fir Donen

D’Pressekonferenz war och den offizielle Start vun engem Opruff fir Donen, fir d’Erhale vun dësem Manuskript fir zukünfteg Generatiounen ze garantéieren.

D’Crowdfunding-Campagne dauert bis de 7. Mäerz 2025. Interesséiert Persoune kënnen sech op der Internetsäit patrimoine.bnl.lu, déi op Franséisch, Englesch, Däitsch a Lëtzebuergesch disponibel ass, informéieren.  Do fannen si Informatiounen iwwert den Opruff, iwwert d’Ënnerstëtzungsméiglechkeeten an d’Eegenaarte vun dësem mëttelalterleche Manuskript.

Spende kënnen iwwer focuna.lu, de Fonds culturel national, per Bankiwwerweisung oder Payconiq gemaach ginn.

Oflaf vun der Pressekonferenz an ugeschwaten Theemen

No enger Begréissung vum Direkter Claude D. Conter huet de Luc Deitz, zoustänneg fir d’Manuskriptesammlung an der BnL, d’Manuskript virgestallt. Duerno huet de Claude D. Conter de Spendenopruff an d’Ënnerstëtzungsméiglechkeete fir dësen ambitiéise Projet erkläert. D’Konferenz gouf mat enger Interventioun vum Kulturminister ofgeschloss, deen déi kulturell a politesch Bedeitung vun dëser Acquisitioun fir de nationale Patrimoine ugeschwat huet:

Dëst historescht Dokument ass net nëmmen ee wichtege Pilier vun eisem kulturellen Ierwen, mee dréit och zu der Entwécklung vum Kulturtourismus zu Lëtzebuerg bäi. D’Erhalen an de Schutz vun dësem Manuskript si wichteg, fir jidderengem an och den zukünftege Generatiounen d’Méiglechkeet ze ginn, déi historesch a kulturell Schätz vun eisem Land ze entdecken. – Eric Thill, Kulturminister