De Cedom publizéiert 6 weider Inventairë vu Museksarchiven op a-z.lu

No der éischter Publikatioun vun Inventairë vu Museksarchiven am November 2023 huet de Cedom dës Offer elo mat den Inventairë vun de Museksarchiven vum Théodore Decker, Peter Faber, Victor Goldschmit, Alfred Kowalsky, René Mertzig a Paul Sontag erweidert. Dës sinn elo fräi op a-z.lu zougänglech.

D’Museksarchiven vun dëse Lëtzebuerger Komponisten ëmfaassen eng Villfalt vun Dokumenter, dorënner:

1. musikalesch an/oder textlech Wierker a Form vu Skizzen, Manuskripter oder Editiounen;
2. Korrespondenzen, wéi Bréiwer a Postkaarten;
3. biographesch Dokumenter, déi d’Ausbildung, de Studium an de beruffleche Wee vum Komponist beschreiwen, wéi Diplomer, Zertifikater, Éieremedailen, CVen, Fotoen a perséinlech Géigestänn;
4. Sammlerstécker wéi Ausschnëtter aus der Press, Programmë vu Concerten, Affichen a signéiert oder kommentéiert Dokumenter.

Dës Museksarchiven ginn en eenzegaartegen Abléck an d’Liewen, d’Wierk an den Impakt vun dëse bedeitenden Museker op d’Kulturgeschicht vum Land.

D’Publikatioun vun dësen Inventairen op a-z.lu stellt e wichtege Meilestee vum kontinuéierlechen Engagement vum Cedom duer, de musekalesche Patrimoine vu Lëtzebuerg accessibel ze maachen. Et ass eng wäertvoll Ressource fir Fuerscher, Studenten, Musekswëssenschaftler an och Museksbegeeschterter.

D’Inventairë sinn a Form vu Lëschte  disponibel, déi ënnert anerem den Titel vum Wierk, d’Auteuren / Komponisten / Arrangeuren, den Datum vun der Kreatioun an d’Format ëmfaassen. Fir dës Lëschten ze consultéieren, sicht einfach op a-z.lu nom Stéchwuert „Fonds“ mam Familljennumm vum jeeweilege Komponist hannendrun. Déi verschidden Inventairë kënne mam Stéchwuert „Fonds musicaux“ fonnt ginn an andeems Dir de Filter „Collections d’archives“ an der Rubrik „Type de document“ aktivéiert.

Iwwersiicht vun de Komponisten an hire Museksarchiven