D’BnL ass méindes méi laang op Vum 31. Mäerz 2025 un

D’Nationalbibliothéik annoncéiert erweidert Ëffnungszäiten. Vum 31. Mäerz 2025 un ass de Liessall vu méindes bis freides vun 10.00 bis 20.00 Auer op, a samschdes vun 10.00 bis 18.00 Auer. War e virdru méindes nëmmen nomëttes zougänglech, kënne Visiteuren elo de ganzen Dag iwwer recherchéieren, léieren an eis Kollektiounen entdecken.

Och wann den Accueil, an d’Guichete vum Prêt a vum Renseignement méindes zou bleiwen, stinn awer automatesch Borne fir de Prêt an de Retour zur Verfügung. Ausserdeem kënnen d’Notzer wéi gewinnt eis Online-Déngschter an Usproch huelen, wéi z. B. d’Aschreiwung iwwer MyGuichet oder d’Reservéiere vu Grupperaim (mat Ausnam vum Museksraum).

D’BnL ass eng lieweg Plaz, déi Studenten, Fuerscher a Kultur­interesséiert unzitt. An de leschte Jore sinn d’Visiteurszuele kontinuéierlech geklommen, e klore Beweis fir déi wuessend Nofro no eise Servicer. Mat den erweiderten Ëffnungszäite wëlle mir eisen Notzer nach méi Flexibilitéit bidden an nach besser op hir Besoinen agoen.