Kuckt eis Dokumenter zum Thema Empathie an Toleranz Nei Selektioun am Espace découverte

Sidd Dir op der Sich no Inspiratioun? All Mount widmen sech eis Chargés de collections engem bestëmmten Thema unhand vun enger Auswiel un Dokumenter aus de Fonge vun der National­­bibliothéik. Entdeckt dëse Mount eis Selektioun zum Thema Empathie an Toleranz!

Si enthält esou wuel Bicher, déi sech mam Verständnes vun dëse Wäerter befaassen, wéi och Bicher, déi hir Entwécklung, Eegenschaften a villsäiteg Ausdrocksformen thematiséieren. E besonnesche Fokus gëtt dobäi op d’Bedeitung vun Empathie an Toleranz fir tëschemënschlech Bezéiunge geluecht, dat am klenge wéi och am grousse Krees, bis hin zum globale Kontext. Unhand vun eenzelnen Titele gëtt awer och op d’Geforen an negativ Aspekter opmierksam gemaach, déi domadder an Zesummenhang stoe kënnen.

Dir fannt dës Selektioun am Espace découverte um Rez-de-chaussée vum Liessall. Wann Iech ee vun dësen Dokumenter interesséiert, kënnt Dir et einfach aus dem Regal huelen. Si kënnen alleguer op der Plaz consultéiert an/oder ausgeléint ginn. Vill Freed beim Liesen!