Maacht mat bei der BnL Summer School 2026!

Dësen August invitéiert d’National­bibliothéik Studenten a Lycées­schüler op d’BnL Summer School 2026: eng Geleeën­heet, d’Beruffer an de Beräicher vum Bibliothéiks­wiesen, vun der Archivéierung a vun der Dokumentatioun kennen­zeléieren.

Iwwer sechs Deeg verfollegen d’Participanten de Wee vum Buch an der Bibliothéik. A praktesche Workshoppen an am Austausch mat Experte léiere si, wéi eng Fäegkeeten a Kompetenzen noutwenneg sinn, fir Dokumenter ze erwerben, ze erhalen a fir d’Lieser zougänglech ze maachen.

D’National­bibliothéik ass den Haapt­acteur vum Bibliothéiks­wiesen zu Lëtzebuerg. Si engagéiert sech fir d’Promotioun vun den informatiouns­wëssenschaft­leche Beruffer duerch Aktivitéiten, Stagen, Beruffs­ausbildungen, Weider- an Éischtaus­bildungen.

Et kann ee sech bis den 3. Mai 2026 umellen.